ທີ່ສູນຊຸມຊົນບ້ານເມືອງຂາຍ ໄດ້ມີການຈັດຝຶກອົບຮົມສ້າງຄວາມສາມາດໃຫ້ແມ່ຍິງ

ໃນວັນທີ່ 17-21 ຕຸລາ 2022 ທີ່ສູນຊຸມຊົນບ້ານເມືອງຂາຍ ໄດ້ມີການຈັດຝຶກອົບຮົມສ້າງຄວາມສາມາດໃຫ້ແມ່ຍິງ, ທັກສະທາງສັງຄົມ ແລະ ສ້າງທຸລະກິດຄອບຄົວໃນຊຸມຊົນ.

ໂດຍການເປັນເປັນປະທານຂອງທ່ານ ສີຊະນະ ບຸບຜາ ຫົວໜ້າກົມການສຶກສານອກໂຮງຮຽນ ກະຊວງສຶກສາທິການ ແລະ ກິລາ, ທ່ານ ຊາຍສະຫວັນ ຈັນມານິດ ຮອງຫົວໜ້າພະແນກສຶກສາທິການແລະກິລາແຂວງຫຼວງພະບາງ, ທ່ານ ເຫຼັກໄຫຼ ສຸດທະວິໄລ ຜູ້ຕາງຫນ້າຫ້ອງການການຮ່ວມມືນາໆຊາດເພື່ອການສຶກສາຜູ້ໃຫ່ຍເຢຍລະມັນ ( DVV ) ພ້ອມດ້ວຍຄະນະຮັບຜິດຊອບ, ທີມງານຄູຝຶກຈາກກົມການສຶກສານອກໂຮງຮຽນ ກະຊວງສຶກສາທິການ ແລະ ກິລາ, ຄູຝຶກຈາກຂະແໜງການສຶກສານອກໂຮງຮຽນ ແລະ ຝຶກອົບຮົມວິຊາຊີບຂັ້ນພື້ນຖານ, ຄູຝຶກສູນພາກເໜືອ, ຈາກຫ້ອງການສຶກສານະຄອນ, ສູນຊຸມຊົນບ້ານເມືອງຂາຍ ແລະ ປະຊາຊົນກຸ່ມເປົ້າໝາຍຈຳນວນ 30 ທ່ານ ເຂົ້າຮ່ວມຢ່າງພ້ອມພຽງ.

ໃນການຝຶກອົບຮົມຄັ້ງນີ້ ທ່ານ ປະທານ ໄດ້ເນັ້ນຫນັກໃຫ້ປະຊາຊົນກຸ້ມເປົ້າໝາຍບໍ່ວ່າຈະເປັນທ່ານຍິງ ຫຼື ທ່ານຊາຍ ໃຫ້ຮູ້ຈັກທັກສະໃນສັງຄົມ, ການເຮັດວຽກເປັນທິມ ແລະ ພາວະການເປັນຜູ້ນຳ, ການວາງແຜນເປົ້າໝາຍຊີວິດ, ປະເມີນສະພາບແວ້ດລ້ອມທ່າແຮງຂອງບ້ານ ແລະ ໂອກາດໃນການສ້າງລາຍໄດ້.

ໂອກາດດັ່ງກ່າວ, ທ່ານ ທອງລຸນ ແກ້ວທອງເພັດ ຫົວໜ້າຂະແໜງການສຶກສານອກໂຮງຮຽນ ແລະ ຝຶກອົບຮົມວິຊາຊີບຂັ້ນພື້ນຖານ ຕາງໜ້າພະແນກສຶກສາທິການ ແລະ ກິລາແຂວງຫຼວງພະບາງ. ໄດ້ໃຫ້ກຽດມອບໃບຢັ້ງຢືນຂອງກົມການສຶກສານອກໂຮງຮຽນ ໃຫ້ຜູ້ທີ່ສຳເລັດການຝຶກອົບຮົມ ພ້ອມດ່ຽວກັນນີ້ທ່ານ ຍັງໄດ້ຮຽກຮ້ອງມາຍັງສຳມະນາກອນທຸກທ່ານພາຍຫຼັງສຳເລັດການຝຶກອົບຮົມແລ້ວໃຫ້ສືບຕໍ່ນຳເອົາຄວາມຮູ້ຄວາມສາມາດໄປຈັດຕັ້ງປະຕິບັດຜັນຂະຫຍາຍປະກອບສວນເຂົ້າໃນການສ້າງເສດຖະກິດຄອບຄົວຂອງຕົນໃຫ້ດີຂື້ນກວ່າເກົ່າ.